Մեքսիկան գրեթե 100 հազար ուժային կներգրավի երկրպագուների անվտանգությունն ապահովելու համար

Մեքսիկայի իշխանությունները ծրագրում են ներգրավել ուժային կառույցների գրեթե 100 հազար աշխատակցի՝ ԱԱ 2026-ում երկրպագուների անվտանգությունն ապահովելու նպատակով։ Այս որոշումը կայացվել է թմրակարտելների հետ կապված շարունակական ճնշումների ֆոնին։

Մեքսիկան մրցաշարը հյուրընկալելու է ԱՄՆ-ի և Կանադայի հետ։ Խաղերը կայանալու են 3 քաղաքներում՝ Մեխիկոյում, Մոնտերեյում և Գվադալախարայում։

Հատկապես Խալիսկո նահանգում, որի մայրաքաղաքը Գվադալախարան է, վերջին շաբաթներին անվտանգության իրավիճակը սրվել է. «Խալիսկոյի նոր սերունդ» կարտելը զինված բախումների մեջ է մտել զինվորականների հետ իր առաջնորդ Նեմեսիո Օսեգերայի լիկվիդացումից հետո։

Աշխարհի առաջնության համակարգող կենտրոնի ղեկավար Ռոման Բարիոսի խոսքով՝ գործողության մեջ կներգրավվի ավելի քան 99,000 մարդ։ Նրանց թվում են՝ մոտ 20,000 զինծառայող և 55,000 ոստիկան, ինչպես նաև մասնավոր պահնորդական ընկերությունների աշխատակիցներ։

Անվտանգության ապահովման համար նախատեսվում է կիրառել մոտ 2,500 ռազմական և քաղաքացիական ավտոմեքենա, 24 թռչող սարք, անօդաչու թռչող սարքերի (ԱԹՍ) դեմ պայքարի համակարգեր և պայթուցիկ նյութեր հայտնաբերող հատուկ վարժեցված շներ։