Կրասնոդարն անակնկալ պարտություն կրեց․ Սպերցյանը մասնակցեց ամբողջ հանդիպմանը

Ռուսաստանի Պրեմիեր լիգայի 20-րդ տուրում «Կրասնոդարը» հյուրընկալվել էր «Ռուբինին» ու զիջեց 1։2 հաշվով։

Հանդիպման հաշիվը բացեց Նազմի Գրիպշին՝ 24-րդ րոպեին։ 73-րդ րոպեին Կոնստանդին Նիժերգորոդովը կրկնապատկեց «Ռուբինի» առավելությունը։ «Կրասնոդարի» միակ գոլը հեղինակեց Ջոն Կորդոբան՝ հիմնական ժամանակին ավելացրած 3-րդ րոպեին։

Հայաստանի ազգային հավաքականի ավագ Էդուարդ Սպերցյանը «Կրասնոդարի» մեկնարկային կազմում էր ու մասնակցեց ամբողջ հանդիպմանը։ Ազգային ընտրանու մեկ այլ կիսապշտպան՝ Ուգոչուկվու Իվուն, վնասվածքի պատճառով, բացակայում էր «Ռուբինի» հայտացուցակից։

Այս խաղից հետո «Կրասնոդարը» 43 միավորով գլխավորում է մրցաշարային աղյուսակը, սակայն 1 հանդիպում ավել է անցկացրել 40 միավոր ունեցող «Լոկոմոտիվից»։ «Ռուբինը» 26 միավորով 7-րդ տեղում է։

Նշենք, որ այս խաղի կայանալու հարցը մեծ հարցականի տակ էր` եղանակային անբարենպաստ պայմանների պատճառով։ Հանդիպման մեկնարկից առաջ Կազանում -12 աստիճան էր՝ ըստ Ցելսիուսի սանդղակի։

Ըստ ՌՊԼ-ի կանոնակարգի, -15-ից ավելի ցածր ջերմաստիճանի պայմաններում հանդիպումը կարող էր հետաձգվել։ Ավելի վաղ, «Կրասնոդարում» քննարկել էին Կազան չմեկնելու տարբերակը, քանի որ նախորդող օրերին Թաթարստանի մայրաքաղաքում գրանցվել էր ավելի ցածր ջերմաստիճան։