Վերադարձն արդեն որոշված էր. Չավին բացահայտել է Մեսսիի՝ Բարսելոնա վերադարձի ձախողման մանրամասները

«Բարսելոնայի» նախկին գլխավոր մարզիչ Չավին պատմել է, թե ինչու չկայացավ Լիոնել Մեսսիի վերադարձը ակումբ։

«Մեսսիի վերադարձը «Բարսելոնա» 2022 թվականի աշխարհի առաջնությունից հետո արդեն գրեթե որոշված էր։ Լեոն ուզում էր վերադառնալ, և մենք նույնիսկ թույլտվություն ունեինք Լա Լիգայից։ Բայց Լապորտան կանգնեցրեց այդ տրանսֆերը… Նա ասաց ինձ, որ եթե Մեսսին վերադառնա, կսկսվի աշխատավարձերի պատերազմ, և նա չի կարող դա իրեն թույլ տալ։

Մեսսին այլևս երբեք չի վերադառնա «Բարսելոնա», պարզապես որովհետև Լապորտան դա չի ցանկանում։ Խոսքը ոչ թե Լա Լիգայի մասին է, և ոչ էլ այն մասին, թե իբր Լեոյի հայրը գումար է ուզում․ այս ամենը սուտ է։ Լապորտան է ասում, որ ակումբը չի կարող իրեն դա թույլ տալ», - ասել է իսպանացին La Vanguardia թերթին տված հարցազրույցում։

Ներկայում Մեսսին խաղում է «Ինտեր Մայամի» ակումբում։