Ռոդրին տուգանվել է 80 հազար ֆունտ ստեռլինգով՝ մրցավարության հասցեին հնչեցրած մեկնաբանությունների համար

«Մանչեսթեր Սիթիի» կիսապաշտպան Ռոդրին տուգանվել է 80 հազար ֆունտ ստեռլինգով (մոտ 92 հազար եվրո) Անգլիայի Պրեմիեր լիգայի 24-րդ տուրի «Տոտենհեմի» հետ հանդիպումից (2:2) հետո մրցավարության վերաբերյալ արված հայտարարությունների համար։ Այսօր՝ մարտի 9-ին, Անգլիայի ֆուտբոլի ասոցիացիան հայտարարել է, որ խաղացողը խուսափել է որակազրկումից, սակայն անկախ լսումների ժամանակ ընդունել է իր մեղքը։

Հանդիպման ավարտից հետո Ռոդրին ասել էր. «Մենք չափազանց շատ ենք հաղթել և մարդիկ չեն ցանկանում, որ մենք նորից հաղթենք, բայց մրցավարը պետք է լինի չեզոք։ Եվ, ազնվորեն ասած, ինձ համար սա անարդար է, սա անարդար է»։

Այս խոսքերը դարձել են կարգապահական վարույթի պատճառ, քանի որ դրանք կասկածի տակ են դրել մրցավարի անաչառությունը։

Ֆուտբոլային ասոցիացիան նշել է, որ Ռոդրին «հանդես է եկել ոչ պատշաճ վարքագծով հետխաղյա հարցազրույցի ժամանակ՝ թույլ տալով մեկնաբանություններ, որոնք ենթադրում են կողմնապահություն և կասկածի տակ են դնում մրցավարի, մրցավարական անձնակազմի ազնվությունը»։

Բացի դրամական տուգանքից, կիսապաշտպանը պաշտոնական նախազգուշացում է ստացել՝ ապագայում նմանատիպ վարքագծի անթույլատրելիության վերաբերյալ։