Իրան են վերադարձել այն ֆուտբոլիստուհիները, որոնք չեն դիմել ապաստանի համար
Իրանի կանանց ազգային հավաքականը Ավստրալիայից մեկնել է հայրենիք: Իրանի կանանց հավաքականի այն մասը, որն ապաստան չէր խնդրել, լքել է Ավստրալիան և ուղևորվել հայրենիք: Ավելի վաղ իրանցի հինգ ֆուտբոլիստուհիներ Ավստրալիայի ոստիկանության օգնությամբ փախել էին թիմի տեղակայման վայրից. նրանց տրամադրվել են հումանիտար վիզաներ:
Ավելի ուշ ևս երկու ֆուտբոլիստուհի ապաստան է խնդրել Ավստրալիայում: Ապաստան ստացած մարզուհիներից մեկը որոշել է վերադառնալ հայրենիք:
Ինչպես հայտնում է ESPN-ը, թիմի մեկնումն ուղեկցվել է բողոքի ակցիաներով այն հյուրանոցի մոտ, որտեղ բնակվում էր թիմը, և օդանավակայանում: Ավստրալիայում բնակվող իրանցիները փորձել են թույլ չտալ թիմի մեկնումը Իրան՝ մտահոգվելով նրանց անվտանգության համար հայրենիք վերադառնալուց հետո:
Երբ ֆուտբոլիստուհիներն անցել են Ավստրալիայի սահմանային հսկողությունը, տեղի պաշտոնյաներն ու թարգմանիչները հերթով նրանցից յուրաքանչյուրին առանձնացրել են ուղեկցող անձանցից և առաջարկել քաղաքական ապաստան:
Նրանցից ոմանք զանգահարել են Իրանում գտնվող իրենց ընտանիքներին՝ առաջարկը քննարկելու համար, սակայն պատվիրակության և ոչ մի այլ անդամ չի որոշել մնալ Ավստրալիայում:
