Իրանի սպորտի նախարարը պահանջում է ԱՄՆ-ին զրկել Աշխարհի առաջնությունն ընդունելու իրավունքից
Իրանի սպորտի նախարար Ահմադ Դոնյամալիի կարծիքով FIFA-ն պետք է զրկի ԱՄՆ-ին 2026 թվականի աշխարհի առաջնության անցկացման իրավունքից։
«FIFA-ն պետք է խլի Աշխարհի առաջնության անցկացման իրավունքը Միացյալ Նահանգներից: Եթե խաղերն անցկացվեին Մեքսիկայում, հնարավոր է՝ մենք կարողանայինք որոշակի միջոցներ ձեռնարկել: Աշխարհի առաջնությանը մնացել է ընդամենը երկու-երեք ամիս, իսկ մենք դեռ գտնվում ենք հակամարտության մեջ։ Մյուս կողմից՝ իրենք են սպառնում, թե մեր հավաքականը վտանգի տակ է»։
Նախարարը նշել է, որ Իրանը լուրջ մտահոգություններ ունի իր ազգային թիմի անվտանգության վերաբերյալ՝ հաշվի առնելով ԱՄՆ նախագահի պահվածքը և հակասական հայտարարությունները։
Դոնյամալին հավելել է, որ եթե Մեքսիկան և FIFA-ն պայմաններ ստեղծեն Իրանի հանդիպումները Մեքսիկայում անցկացնելու համար, իրենք պատրաստ կլինեն քայլեր ձեռնարկել, սակայն ներկա առճակատման պայմաններում դա դեռ հնարավոր չէ։
«Հուսով եմ, որ պայմաններն այնպիսին կլինեն, որ մեր հավաքականը կարողանա մասնակցել Աշխարհի առաջնությանը, բայց այս պահին դրանք չկան», — նախարարի խոսքերն է մեջբերում SNN-ը:
Հիշեցնենք, որ փետրվարի 28-ին ԱՄՆ-ն և Իսրայելը համատեղ ռազմական գործողություն սկսեցին Իրանի դեմ: Ի պատասխան՝ Իրանը հարվածներ հասցրեց ամերիկյան ռազմակայաններին և այլ օբյեկտներին Իսրայելում, Կատարում, ԱՄԷ-ում, Սաուդյան Արաբիայում, Քուվեյթում և Բահրեյնում:
