Հունահռոմեականները վերադարձել են Մ23 տարեկանների Եվրոպայի առաջնությունից և կիսվել տպավորություններով
Ըմբշամարտի Մ23 տարեկանների Եվրոպայի առաջնությունում մեդալներ նվաճած հայ ըմբիշներն այս գիշեր վերադարձել են հայրենիք:
Երիտասարդական ԵԱ-ի ոսկե մեդալակիր Սուրեն Աղաջանյանը ֆեդերացիայի հետ զրույցում խոսել է ամենաբարդ գոտեմարտի և եզրափակչում՝ մրցակցի խորամանկության մասին:
«Իհարկե, հաղթանակի հետևից էի գնացել. անգամ այն դրոշը, որով որ ես գորգի մեջ վազեցի, դա իմ անձնական դրոշն է եղել, ես իմ հետ նախօրոք տարել էի: Ամենալարված գոտեմարտը երևի լեհի հետ գոտեմարտն էր, որովհետև ինչ-որ պահի զգոնությունս թուլացնելու պատճառով միավորներ բաց թողեցի, բայց ֆունկցիոնալս թույլ տվեց, որ հետո այդ ամեն ինչը հետ բերեմ։
Այդ երկրորդ հնարքը, որ սկսեցի անել, դա կոպիտ ասած պահեստային էի պահել, որովհետև իրենք, որ տեսել էին ես կրծքից եմ գլորումներս կատարում, վրացու կողերը ամբողջովին յուղել էին ու դա ես գիտեի, փորձեցի մի պահ բռնեմ, զգացի, որ չի ստացվելու: Դրա համար արդեն անցա մյուս տարբերակներին, որը իրենք ոչ տեսել էին, ոչ սպասում էին»,- ասել է Աղաջանյանը։
ԵԱ-ի ոսկե մեդալակիր Արամայիս Հարությունյանը ևս խոսել է մրցաշարի մասին. «Ամենաբարդ գոտեմարտը, դե բնականաբար, եզրափակիչ գոտեմարտն էր, հակառակորդս Եվրոպայի չեմպիոն, աշխարհի չեմպիոն էր, լուրջ մրցակից էր: Կարողացա ճիշտ գոտեմարտի շնորհիվ հաղթանակի նժարը թեքել դեպի մեր կողմ»:
