Ռոնի Օ՛Սալիվանը պատմության աննախադեպ քանակի միավոր է վաստակել

Աշխարհի յոթակի չեմպիոն Ռոնի Օ’Սալիվանը թարմացրել է սնուկերի պատմության հնարավոր առավելագույն անընդմեջ միավորների ռեկորդը: Անգլիացին World Open-ի քառորդ եզրափակչի՝ Ռայան Դեյի դեմ խաղում (5:0) գրանցել է 153 միավորանոց շարք:

Ռոնին 147 միավորից ավելի հավաքելու հնարավորություն է ստացել, քանի որ մրցակիցը սխալվեց իր հարվածի ժամանակ, և մրցավարը նշանակեց «ազատ գնդակ»: Արդյունքում սնուկերիստն անընդմեջ ոչ թե 15 զույգ հարված է կատարել, այլ՝ 16: «Ազատ գնդակի» դեպքում հնարավոր է հավաքել առավելագույնը 155 միավոր, սակայն անգլիացին երկու անգամ սև գնդակի փոխարեն խաղարկել է վարդագույնը:

Նախորդ ռեկորդը պատկանում էր շոտլանդացի Ջեյմի Բերնեթին: 2004 թվականին Մեծ Բրիտանիայի առաջնության որակավորման փուլում, նմանատիպ իրավիճակում, նա գրանցել էր 148 միավորանոց սերիա: