Ֆան-ակումբների համար սահմանված տեղերը և տոմսերի քանակը մնացել են անփոփոխ. ՀՖՖ-ի հայտարարությունը
Չնայած մի քանի օր առաջ ֆան-ակումբների կողմից արված հայտարարությանը՝ նրանցից ոչ մեկը պաշտոնապես չի դիմել Հայաստանի ֆուտբոլի ֆեդերացիային տոմսերի հետ կապված որևէ հարցով: Այս մասին հայտնում է ՀՖՖ մամուլի բաժինը:
«Ֆան-ակումբների համար սահմանված տեղերը մարզադաշտի տրիբունաներում և նրանց հատկացվող տոմսերի քանակը նախորդ հանդիպումների համեմատ մնացել են անփոփոխ: Կոչ ենք անում ազգային հավաքականի հանդիպումներից առաջ չդիմել նման մանիպուլյացիաների: Անվտանգության նկատառումներից ելնելով և կուտակումներից խուսափելու նպատակով՝ խնդրում ենք բոլորին մարզադաշտ ժամանել խաղից առնվազն 2 ժամ առաջ»,- ասվում է ֆեդերացիայի տարածած հաղորդագրության մեջ:
ՈՒԵՖԱ Ազգերի Լիգայի անցումային փլեյ-օֆֆի Հայաստան-Վրաստան հանդիպումը կկայանա մարտի 20-ին Վազգեն Սարգսյանի անվան «Հանրապետական» մարզադաշտում: Այսօրվանից տոմսերը հասանելի են tickets.ffa.am կայքում: ՀՖՖ-ից տեղեկանում ենք՝ ինչպես այս, այնպես էլ Հայաստանի ազգային հավաքականի հաջորդ բոլոր հանդիպումների համար տոմսերի վաճառքն իրականացվելու է միմիայն առցանց տարբերակով, այսինքն՝ տոմսերի ֆիզիկական վաճառք չի նախատեսվում:
Յուրաքանչյուր անձ կարող է գնել Հայաստան - Վրաստան հանդիպման ոչ ավել, քան 4 տոմս: Տոմսերն արժեն 1000-ից 12 հազար դրամ:
