Պաշտոնական․ Իգոր Տուդորը հեռացված է Տոտենհեմի գլխավոր մարզչի պաշտոնից
«Տոտենհեմը» հայտարարել է թիմի գլխավոր մարզիչ Իգոր Տուդորի պաշտոնանկության մասին:
«Մենք հաստատում ենք, որ փոխադարձ համաձայնությամբ գլխավոր մարզիչ Իգոր Տուդորը հեռանում է ակումբից: Տոմիսլավ Ռոգիչը և Ռիկարդո Ռագնաչին նույնպես թողել են դարպասապահների մարզչի և ֆիզպատրաստության մարզչի իրենց պաշտոնները:
Մենք շնորհակալություն ենք հայտնում Իգորին, Տոմիսլավին և Ռիկարդոյին վերջին վեց շաբաթվա ընթացքում իրենց գործադրած ջանքերի համար, որոնց ընթացքում նրանք անդադար աշխատել են: Մենք նաև մեր ցավակցությունն ենք հայտնում Իգորին՝ հարազատ մարդու կորստի կապակցությամբ, և այս դժվարին պահին աջակցություն ենք հայտնում նրան ու նրա ընտանիքին:
Նոր գլխավոր մարզչի մասին տեղեկատվությունը կտրամադրվի մոտ ժամանակներս», — հայտնում է «Տոտենհեմի» էջը X սոցիալական ցանցում:
Հիշեցնենք, որ ավելի վաղ լոնդոնյան ակումբը բաժանվել էր Անգելոս Պոստեկոգլուից և Թոմաս Ֆրանկից՝ մեկ տարուց էլ քիչ ժամանակահատվածում հեռացնելով երեք գլխավոր մարզիչների:
Տուդորը մարզում էր «Տոտենհեմը» փետրվարի 14-ից: Նրա գլխավորությամբ թիմը յոթ խաղում կրել է հինգ պարտություն: Այս պահին լոնդոնյան ակումբը 30 միավորով զբաղեցնում է Պրեմիեր լիգայի մրցաշարային աղյուսակի 17-րդ հորիզոնականը՝ ընդամենը մեկ միավոր գերազանցելով վտանգավոր գոտում գտնվող «Վեստ Հեմից»:
