Անչելոտին խոստացավ, որ դա տեղի կունենա. Սան Մարինոյի հավաքականի մարզիչը՝ Բրազիլիայի դեմ խաղի մասին

Սան Մարինոյի հավաքականի գլխավոր մարզիչ Ռոբերտո Չևոլին խոսել է Բրազիլիայի հավաքականի հետ հնարավոր ընկերական խաղի մասին: Նա նախկինում խաղացել է Կառլո Անչելոտիի գլխավորությամբ «Ռեջիանայում»:

«Անչելոտին զանգահարեց ինձ, երբ մենք Ազգերի լիգայի D խմբում առաջին տեղը գրավեցինք և շնորհավորեց մեզ այս արդյունքի համար: Դա շատ հուզիչ էր: Ես առաջարկեցի նրան կազմակերպել Բրազիլիայի և Սան Մարինոյի միջև ընկերական խաղ: Նա խոստացավ, որ դա տեղի կունենա:

Դարպասապահ Էդոարդո Կոլոմբոն և հարձակվող Նիկոլա Նաննին մեր թիմի միակ պրոֆեսիոնալ խաղացողներն են: Մնացածը խաղում են Սան Մարինոյի լիգայում, Սերիա D-ում կամ Էչելենցայում: Նրանք նաև այլ աշխատանքներ ունեն. ոմանք աշխատում են գործարաններում, մյուսները՝ հաշվապահներ, գրաֆիկական դիզայներներ, պահեստապետներ, իսկ մյուսները օգնում են ընտանեկան բիզնեսին: Հաճախ պատահում է, որ նրանք ուշանում են մարզումներից գրասենյակներում 8 ժամ անցկացնելուց հետո:

Ոմանք նույնիսկ ստիպված են լինում արձակուրդ վերցնել՝ արտագնա խաղերին մեկնելու համար: Բոլորը զոհողություններ են անում, բայց ոչ ոք չի բողոքում: Իմ տղաները աներևակայելիորեն հավատարիմ են Սան Մարինոյի մարզաշապիկին», - Չևոլիի խոսքերն է մեջբերում La Gazzetta dello Sport-ը: