Բարսելոնան նոր թեկնածու ունի հարձակման ձախ եզրի համար

«Բարսելոնան» կարող է ձեռք բերել «Բենֆիկայի» վինգեր Անդրեաս Շելդերուպին:

Ինչպես հայտնում է Marca-ն, կատալոնացիների մարզական տնօրեն Դեկուն նորվեգացուն դիտարկում է որպես հաջորդ մրցաշրջանում հարձակման ձախ եզրն ուժեղացնելու տարբերակներից մեկը:

«Բարսելոնայի» առաջնահերթությունը դեռևս Մարկուս Ռեշֆորդին թիմում պահելն է՝ «Մանչեսթեր Յունայթեդից» վարձակալության ժամկետի ավարտից հետո: Սակայն «կապտանռնագույնները» 30 միլիոն եվրո հրաժարագինը համարում են չափազանցված, իսկ մանկունիանցիները մտադիր չեն նվազեցնել գինը: Այս համատեքստում 21-ամյա Շելդերուպը դիտվում է որպես հեռանկարային ներդրում ակումբի ապագայի համար:

Նշվում է, որ «Բենֆիկան» Շելդերուպի տրանսֆերային արժեքը գնահատում է 20 միլիոն եվրո, թեև նորվեգացու պայմանագրով նախատեսված հրաժարագինը կազմում է 100 միլիոն եվրո: «Բարսելոնայի» վերջնական որոշումը կկայացվի հաշվի առնելով ֆինանսական «ֆեյր-փլեյի» կանոնները:

Նորվեգացին ընթացիկ մրցաշրջանում, բոլոր մրցաշարերում, մասնակցել է 36 հանդիպման՝ դառնալով 7 գոլի ու 4 գոլային փոխանցման հեղինակ։