Ռուի Տավարեշ. 17-ամյա Թովմասյանը մեկ օրինակ է, հնարավոր է ևս 2-3-ը լինեն
«Արարատի» գլխավոր մարզիչ Ռիկարդո Դիոնիսիոյի օգնական Ռուի Տավարեշը երևանյան ակումբի մամուլի ծառայության հետ զրույցում խոսել է Հայաստանի գավաթի քառորդ եզրափակիչում «Ուրարտուի» նկատմամբ արտագնա հաղթանակի (3:2) մասին: Երկխաղյա դիմակայությունում «Արարատը» պարտվել է 3:5 հաշվով և դուրս մնացել պայքարից:
«Հաղթելը միշտ կարևոր է: Բայց ավելի կարևոր է, որ մեր ֆուտբոլիստները երբեք չեն հանձնվում: Սա լավ դաս է մեր ապագայի համար: Այս պատանիները միշտ լավ են մարզվում: Մեր գլխավոր մարզիչը ցանկանում է այդ մոտեցումն ամրապնդել ֆուտբոլիստների ուղեղում՝ երբեք չհանձնվել, մշտապես հավատալ: Արդեն վաղվանից պատրաստվելու ենք հաջորդ հանդիպմանը: Փորձելու ենք հաղթել բոլոր խաղերը:
Գլխավոր մարզիչը հանդերձարանում միշտ ասում է, որ հավատում է բոլոր ֆուտբոլիստներին: Նրանք էլ յուրաքանչյուր խաղում պետք է ցույց տան, որ կարող են լավ խաղալ: Այս գավաթային խաղը հիանալի հնարավորություն էր նրանց համար, ովքեր քիչ խաղաժամանակ էին ստանում:
«Ուրարտուի» նկատմամբ կարևոր հաղթանակ էր: Բոլորն էլ գիտեն, որ մրցաշրջանը «Արարատի» համար լավ չի ընթանում: Բայց միշտ էլ հաղթանակից հետո ավելի լավ ես մարզվում: Դիոնիսիոն միշտ ուշադիր է երիտասարդ խաղացողների նկատմամբ, ինչպիսին 17-ամյա Վահե Թովմասյանն է: Նրան մեկնարկային կազմում դուրս բերելը խոսքերիս լավ օրինակն է: Մարզիչը չի վախենում ասպարեզ դուրս բերել պատանուն: Վահեն մեկ օրինակ է, բայց հնարավոր է ապագայում ևս 2-3 նման պատանիներ խաղան»,- ասել է պորտուգալացին:
