Գոլեր, ծեծկռտուք ու կամային հաղթանակ. Անդրանիկ-Սյունիք խաղը գերլարված ստացվեց
Հայաստանի գավաթի քառորդ եզրափակիչի «Անդրանիկ» – «Սյունիք» պատասխան խաղը գերլարված ու արդյունավետ ստացվեց: «Անդրանիկը» հաղթեց 5:2 հաշվով և իր պատմության մեջ առաջին անգամ դուրս եկավ Գավաթի կիսաեզրափակիչ:
Հաշիվը 20-րդ րոպեին բացեց Պետրոս Աֆաջանյանը, որը, ցավոք, երկրորդ խաղակեսում ծանր վնասվածք ստացավ և փոխարինվեց: Բաց թողած գոլից 9 րոպե անց Մայքլ Նդիդին գլխի հարվածով հավասարեցրեց հաշիվը, իսկ 41-րդ րոպեին նիգերացու փոխանցումից հետո գեղեցիկ գոլ խփեց Էրիկ Պետրոսյանը:
Ընդմիջումից հետո՝ 61-րդ րոպեին, Վաչե Հակոբյանն անհավանական գոլ խփեց գրեթե զրոյական անկյունից. գնդակն անդրադարձավ դարպասաձողից ու հայտնվեց դարպասում:
3:1 հաշվից հետո կրկին ակտիվացավ «Սյունիքը» և 6 րոպե անց գոլ խփեց Արմեն Հովհաննիսյանի շնորհիվ: Դարպասի գրավումից հետո վիճաբանություն սկսվեց ֆուտբոլիստների միջև, ինչի արդյունքում մրցավար Հենրիկ Նալբանդյանը կարմիր քարտ ցույց տվեց կապանցիների ֆուտբոլիստ Սուրեն Առաքելյանին:
Մրցավարը խաղին ավելացրեց 12 րոպե, որի ընթացքում փոխարինման մտած Կամիլ Յեն դուբլ գրանցեց և ամրապնդեց վարդենիսցիների հաղթանակը:
«Անդրանիկը» դարձավ Հայաստանի գավաթի կիսաեզրափակիչի երրորդ մասնակիցը: Ավելի վաղ ուղեգիր էին նվաճել «Նոան» և «Ուրարտուն»:
