Մբապեն իր գոլերով մեզ վստահություն է ներշնչում․ Վինիսիուս

Մադրիդի «Ռեալի» վինգեր Վինիսիուս Ջունիորը Չեմպիոնների լիգայի քառորդ եզրափակիչի «Բավարիայի» դեմ առաջին հանդիպման նախաշեմին անդրադարձել է Կիլիան Մբապեի հետ իր խաղային համագործակցությանը և թիմում տիրող մթնոլորտին:

Պատասխանելով այն քննադատություններին, թե իրենց զույգը արդյունավետ չէ վճռորոշ խաղերում, 25-ամյա բրազիլացին նշել է.

«Մարդիկ շատ բաներ են ասում։ Կիլիանն այստեղ է մեզ օգնելու համար և նա իր գոլերով վստահություն է ներշնչում մեզ։ Վաղը մեզ լավ համագործակցություն է պետք. սա մեծ հանդիպում է, իսկ նման պահերին արդյունք են ապահովում հիանալի խաղացողները և Մբապեն հենց այդպիսին է։ Մենք լավ կապ ունենք ինչպես դաշտում, այնպես էլ դաշտից դուրս: Մենք միասնական ենք և միասին պայքարելու ենք այս ակումբի համար»,-նշել է Վինիսիուսը։

«Ռեալ Մադրիդ»-«Բավարիա» հանդիպումը կկայանա վաղը՝ ապրիլի 7-ին և կմեկնարկի 23։00-ին։