Ես կհաղթեի Խաբիբին, քանի որ ավելի ունիվերսալ մարտիկ եմ․ Արման Ծառուկյան

UFC-ի թեթև քաշային կարգի վարկանիշային աղյուսակի 1-ին համար Արման Ծառուկյանը վստահություն է հայտնել, որ եթե մենամարտեր Խաբիբ Նուրմագոմեդովի հետ, ապա կկարողանար առավելության հասնել դիվիզիոնի նախկին չեմպիոնի նկատմամբ։

«Ո՞վ կհաղթեր։ Ես։ Ինչպե՞ս կհաղթեի նրան։ Ամենայն հավանականությամբ՝ մրցավարների որոշմամբ։ Ո՞րն է իմ գլխավոր առավելությունը։ Իմ հմտությունները։ Ես ունիվերսալ մարտիկ եմ՝ ավելի ունիվերսալ, քան նա»,-բլոգեր Նավիդ Յուսուֆիի հետ զրույցում նշել է Ծառուկյանը։

Հիշեցնենք, որ Արման Ծառուկյանը MMA-ում իր նորամուտը նշել է 2016 թվականին, իսկ 2019-ից հանդես է գալիս UFC-ում։ Իր վերջին մենամարտում, որը կայացել է նախորդ նոյեմբերին Դոհայում (UFC Fight Night 264-ի ընթացքում), Ծառուկյանը երկրորդ ռաունդում խեղդող հնարքով հաղթել է ավստրալացի Դեն Հուկերին։