Այս հանդիպումն առանձնահատուկ է, քանի որ սա Չեմպիոնների լիգան է․ Ֆլիկը՝ Ատլետիկոյի դեմ խաղից առաջ

Չեմպիոնների լիգայի քառորդ եզրափակիչի «Բարսելոնա»-«Ատլետիկո Մադրիդ» դիմակայության 1-ին խաղից առաջ կատալոնական ակումբի գլխավոր մարզիչ Հանսի Ֆլիկը խոսել է սպասվող հանդիպման մասին․

««Ատլետիկոն» բարդ մրցակից է: Այս թիմը հիանալի է տրամադրվում խաղերին, ունի բարձր ինտենսիվություն և ֆանտաստիկ ֆուտբոլիստներ, այնպես որ նրանց հետ հանդիպումները միշտ դժվար են դասավորվում: Երկու խաղերն էլ շատ էմոցիոնալ կլինեն և մենք կփորձենք լավ արդյունքի հասնել: Մենք ունենք մեր ոճը և պետք է հավատարիմ մնանք դրան: Մեզ անհրաժեշտ է պրեսինգի ենթարկել մրցակցին և գտնել ազատ գոտիներ: Կարևորը հենց առաջին րոպեներից կենտրոնացվածությունը պահպանելն է:

Այս հանդիպումն առանձնահատուկ է, քանի որ սա Չեմպիոնների լիգան է, և մենք բոլորս ցանկանում ենք ցույց տալ մեր առավելագույնը: Կարևոր է մեր ձեռագրին հավատարիմ մնալը և յուրաքանչյուրի մասնակցությունը պաշտպանությանը. մենք պետք է հավուր պատշաճի պահենք մեր դիրքերը: Զգացողություն ունեմ, որ մեր երկրպագուների և խաղացողների միջև ֆանտաստիկ կապ է հաստատվել: Վաղը մեզ պետք կգա նրանց աջակցությունը»,-նշել է Ֆլիկը։

«Բարսելոնա»-«Ատլետիկո Մադրիդի» հանդիպումը կկայանա ապրիլի 8-ին։ Մեկնարկը՝ 23։00-ին։