Մրցավարական սկանդալ ՉԼ-ում. Բարսելոնան մրցավարների որոշումների մեջ միտումներ է նկատում ու բողոք է ներկայացրել ՈւԵՖԱ-ին
Կատալոնական «Բարսելոնան» պաշտոնապես դիմել է ՈւԵՖԱ-ին՝ բողոքարկելով Չեմպիոնների լիգայի քառորդ եզրափակչի առաջին խաղում (0:2) տեղի ունեցած մրցավարական որոշումները։ Ակումբը գտնում է, որ Մադրիդի «Ատլետիկոյի» հետ հանդիպման ժամանակ մրցավարի գործողությունները հակասել են գործող կանոնակարգին, ինչն անմիջականորեն ազդել է խաղի ընթացքի և վերջնարդյունքի վրա։
Բողոքի հիմնական պատճառը հանդիպման 54-րդ րոպեին տեղի ունեցած միջադեպն է: Խաղի վերսկսումից հետո մադրիդյան թիմի պաշտպան Մարկ Պուբիլը սեփական տուգանային հրապարակում ձեռքով կանգնեցրել է գնդակը, որն իրեն էր փոխանցել դարպասապահ Խուան Մուսոն: Գլխավոր մրցավար Իշտվան Կովաչը չի արձագանքել դրվագին և չի նշանակել 11-մետրանոց հարված։
«Բարսելոնան» գտնում է, որ այս որոշումը, VAR-ի անգործությանը համատեղ, լուրջ սխալ է։ Այդ կապակցությամբ ակումբը պահանջել է հետաքննություն անցկացնել, տրամադրել մրցավարների բանակցությունների ձայնագրությունները և, անհրաժեշտության դեպքում, պաշտոնապես ընդունել սխալներն ու ձեռնարկել համապատասխան միջոցներ»,-նշված է ակումբի իրավաբանական դեպարտամենտի հայտարարության մեջ։
«Բարսելոնան» շեշտում է, որ սա եզակի դեպք չէ և դիտարկում է այն որպես միտում.
«Սա առաջին դեպքը չէ Չեմպիոնների լիգայի վերջին մրցաշրջանների ընթացքում, երբ անհասկանալի մրցավարական որոշումները լուրջ վնաս են հասցնում թիմին՝ ստեղծելով ակնհայտ անհավասարություն և թույլ չտալով նրան մրցակցել այլ ակումբների հետ հավասար պայմաններում»։
