Մարմնամարզության աշխարհի գավաթ. Հայաստանի 3 ներկայացուցիչ եզրափակչում է

Սպորտային մարմնամարզության Հայաստանի հավաքականի 3 անդամներ դուրս են եկել Խորվաթիայի Օսիյեկ քաղաքում ընթացող աշխարհի գավաթի խաղարկության վերջին փուլի եզրափակիչ։

Համլետ Մանուկյանն ու Մամիկոն Խաչատրյանը դուրս են եկել նժույգ թափեր վարժության եզրափակիչ:  Որակավորման փուլում Մանուկյանը վաստակել է 14.666 միավոր և 3-րդ տեղով դուրս եկել եզրափակիչ, իսկ Խաչատրյանը ցույց է տվել 4-րդ արդյունքը՝ 14.533 միավորով: 

Հայաստանի մյուս ներկայացուցիչ Արթուր Ավետիսյանն օղակների վարժության որակավորման փուլում գրավել է երրորդ տեղը՝ 14.133 միավորով:

Օլիմպիական խաղերի արծաթե, բրոնզե մեդալակիր, աշխարհի չեմպիոն, Եվրոպայի եռակի չեմպիոն Արթուր Դավթյանը, որը ոսկե մեդալ էր նվաճել Եգիպտոսի մայրաքաղաք Կահիրեում օրերս անցկացված աշխարհի գավաթի խաղարկության չորրորդ փուլում, այսօր հանդես կգա հենացատկի վարժության որակավորման փուլում։