Ռեկորդ․ Սպերցյանը Կրասնոդարի ակադեմիայի սաների շրջանում խաղերի քանակով գերազանցել է Սաֆոնովին

Չորեքշաբթի՝ ապրիլի 8-ին, «Կրասնոդարը»  հյուրընկալվել է Մոսկվայի «Դինամոյին» Ռուսաստանի գավաթի ՌՊԼ ուղու եզրափակչի առաջին խաղում։ Մոսկվայում կայացած խաղն ավարտվել է ոչ-ոքի՝ 0։0 հաշվով։

Հայաստանի հավաքականի կիսապաշտպան Էդուարդ Սպերցյանն անցկացրել է իր 176-րդ խաղը «Կրասնոդարի» հիմնական կազմում և այս ցուցանիշով զբաղեցրել առաջին տեղն ակումբի ակադեմիայի սաների շրջանում։ Սպերցյանը գերազանցել է նախկին դարպասապահ Մատվեյ Սաֆոնովի ցուցանիշը (175 խաղ), որը ներկայում հանդես է գալիս ՊՍԺ-ում։

Սպերցյանից ավելի շատ հանդիպումներ «Կրասնոդարի» կազմում անցկացրել են միայն յոթ ֆուտբոլիստներ։ Նրանցից ոչ մեկը ակումբի ակադեմիայի սան չէ՝ Սերգեյ Պետրով (339), Յուրի Գազինսկի (289), Ալեքսանդր Մարտինովիչ (269), Ժոաոզինյո (217), Մաուրիսիո Պերեյրա (201), Կրիստիան Ռամիրես (187), Անդրեաս Գրանկվիստ (181)։