Կրասնոդարցի բռնցքամարտիկ Նունե Ասատրյանը հաղթել է Սերբիայում կայացած բռնցքամարտի մրցումներում և դարձել աշխարհի չեմպիոն։ Այս մասին հայտնի է դարձել մարտի 17-ին։
Ռուսաստանը ներկայացնող մարզուհին ոսկե մեդալ է նվաճել Նիշ քաղաքում (Սերբիա) կայացած բռնցքամարտի կանանց աշխարհի առաջնությունում։ 60 կգ քաշայինների պայքարում Ասատրյանն առավելության է հասել ղազախստանցի Վիկտորյա Գրաֆեևայի դեմ։
Սա միջազգային ու համառուսաստանյան մրցույթների բազմակի հաղթող ու մրցանակակիր, սպորտի միջազգային վարպետ Նունե Ասատրյանի հերթական նշանակալից հաղթանակն է։
Նունեն ծնվել է 2001 թվականի հունիսի 15-ին Հայաստանի Սառնաղբյուր գյուղում։ Աղջիկը բռնցքամարտով զբաղվում է 9 տարեկանից և լավ արդյունքներ է ցույց տալիս բոլոր մրցումներում ու առաջնություններում՝ ցուցադրելով բարձր պատրաստվածություն և դիմացկունություն։ Ներկայում նա մարզվում է Կրասնոդարի մարտարվեստի դպրոցում։
2025 թվականի բռնցքամարտի կանանց աշխարհի առաջնությունը անցկացվել է մարտի 8-ից 17-ը Նիշում։ Նշենք, որ առաջնության հաղթողներն ու մրցանակակիրները ստացել են նաև դրամական պարգևներ՝ ոսկե մեդալի համար՝ 100 հազար դոլար, արծաթե մեդալի համար՝ 50 հազար դոլար, բրոնզե մեդալի համար՝ 25 հազար դոլար։
