Նոան Դոհայի հավաքի ընկերական խաղում հաղթել է 8:0 հաշվով
«Նոան» Դոհայում ընթացող ուսումնամարզական հավաքի ընթացքում ստուգողական հանդիպում է անցկացրել «Ալ Մաշաֆ» թիմի հետ և 8:0 հաշվով ջախջախիչ հաղթանակ տարել մրցակցի նկատմամբ:
Ռուի Մոտայի թիմի կազմում դուբլի հեղինակ է դարձել Գրենիկ Պետրոսյանը, մեկական անգամ էլ աչքի են ընկել Զավեն Խուդավերդյանը, Գոնսալո Գրեգորիան, Մաթեուս Այասը, Հելդեր Ֆերեյրան, Բրայան Մենդոզան և Բրունո Ալմեյդան:
Նշենք՝ պորտուգալացի աջ եզրային Բրունո Ալմեյդան, որն օրերս էր համալրել հայկական թիմի շարքերը, իր առաջին գոլն է խփել «Նոայի» կազմում:
Ուսումնամարզական հավաքի շրջանակում «Նոան» ավելի վաղ 2:1 հաշվով առավելության էր հասել «Զենիթի» նկատմամբ: Սանկտ-Պետերբուրգը ներկայացնող թիմի դեմ ստուգողական խաղում մեր «Նոայի» մարզաշապիկով առաջին անգամ դաշտ էին դուրս եկել թիմի նորեկներ Բրունո Ալմեյդան և Ջեյմս Սանթոսը, դարպասապահ Արթուր Կոնեգլյանը, ինչպես նաև «Նոա-2»-ի երիտասարդ ֆուտբոլիստներ՝ 17-ամյա Արթուր Մովսեսյանը և 21-ամյա Մոհամադ Մբիլիան։
«Նոայի» ուսումնամարզական հավաքը կտևի մինչև փետրվարի 10-ը:
