Ռոնալդուն 100-րդ գոլն է խփել Սաուդյան Արաբիայում. նա դա արել է 105 խաղում

«Ալ-Նասրի» հարձակվող Կրիշտիանու Ռոնալդուն գոլ է խփել Սաուդյան Արաբիայի Պրեմիեր լիգայի 33-րդ տուրի՝ «Ալ-Շաբաբի» դեմ խաղում, որն ավարտվել է իր թիմի՝ 4-2 հաշվով հաղթանակով։ Նա գոլի հեղինակ է դարձել 75-րդ րոպեին Սադիո Մանեի փոխանցումից հետո: 

Այս գոլը 41-ամյա պորտուգալացու համար 100-րդն էր Սաուդյան Արաբիայի Պրեմիեր լիգայում։ Նրան այս ցուցանիշին հասնելու համար պահանջվել է 105 խաղ։

Այս մրցաշրջանում ֆուտբոլիստը Պրոֆեսիոնալ լիգայում անցկացրած 28 խաղում խփել է 26 գոլ և կատարել երեք գոլային փոխանցում։

Այս գոլը նաև Ռոնալդուի կարիերայի 971-րդ գոլն էր. նա 1088 ակումբային խաղում խփել է 828 գոլ, իսկ Պորտուգալիայի ազգային հավաքականի կազմում անցկացրած 226 խաղում՝ 143 գոլ։

Նրան 29 գոլ է պակասում կարիերայի 1000-րդ գոլին հասնելու համար: