Հայաստանի համար խաղալն ինձ համար ամենամեծ պատիվն է. Հրանտ-Լեոն Ռանոս
«Բոլոր նրանք, ովքեր ինձ ճանաչում են, գիտեն, որ իմ երկրի՝ Հայաստանի համար խաղալն ինձ համար հնարավոր ամենամեծ պատիվն է»: Այս մասին Instagram-ի իր էջում կատարած գրառմամբ հայտնել է հարձակվող Հրանտ-Լեոն Ռանոսը, որը երեկ հեռացվել է ազգային թիմից՝ գլխավոր մարզիչ Ջոն Վան՛տ Սխիպի հետ ունեցած տարաձայնության պատճառով:
21-ամյա ֆուտբոլիստն ընդգծել է՝ համոզված է եղել, որ մարզչի հետ ունեցած խոսակցության գաղտնիությունը կպահպանվի:
«Ցանկանում էի պարզապես մարզչին տեղեկացնել, որ ես պատրաստ եմ այս խաղին, ինձ լավ եմ զգում և մոտիվացված եմ՝ թիմին օգնելու համար: Անսպասելիորեն՝ մարզիչն ասաց, որ առաջիկա խաղում ինձ հետ հույս չի կապում: Սա,իհարկե, ինձ շատ տխրեցրեց: Խաղաժամանակ ստանալն այս պահին ինձ համար շատ կարևոր է, և քանի որ այն ստանալու հեռանկար չունեի, համաձայնվեցի վերադառնալ Կայզերլաուտերն՝ պատրաստվելու հաջորդ խաղին: Մենք այս որոշմանը միասին ենք եկել»,- գրել է Ռանոսը սոցիալական ցանցերի իր էջում՝ ևս մեկ անգամ ընդգծելով, որ իր համար ավելի լավ բան չկա, քան Հայաստանի համար խաղալը:
