Մոսկվայի Սպարտակը հետխաղյա հարվածաշարում հաղթեց Կրասնոդարին՝ նվաճելով Ռուսաստանի գավաթը․ Սպերցյանը 2-րդ փորձից իրացրեց 11-մետրանոցը

Ռուսաստանի գավաթի խաղարկության եզրափակիչում «Կրասնոդարը» մրցում էր Մոսկվայի «Սպարտակի» հետ։ Հանդիպման հիմնական ժամանակն ավարտվեց 1։1 հաշվով։ Պաբլո Սոլարիի 36-րդ րոպեին խփած գոլին պատասխանեց Դուգլաս Աուգուստոն՝ 57-րդ րոպեին։

Լրացուցիչ ժամանակում գոլեր չեղան, իսկ հետխաղյա 11-մետրանոց հարվածաշարում ավելի դիպուկ էին մոսկովյան ակումբի ֆուտբոլիստները։ 

Հայաստանի ազգային հավաքականի ավագ Էդուարդ Սպերցյանն ընդգրկված էր «Կրասնոդարի» մեկնարկային կազմում և մասնակցեց ամբողջ հանդիպմանը։ Հետխաղյա հարվածաշարում Սպերցյանը առաջին փորձից չիրացրեց հարվածը, քանի որ մրցակցի դարպասապահը ժամանակից շուտ էր հատել դարպասային գիծը, իսկ երկրորդ փորձից դիպուկ էր։

«Կրասնոդարը» երբեք չի նվաճել Ռուսաստանի գավաթը, իսկ «Սպարտակը» 5-րդ անգամ դարձավ Ռուսաստանի գավաթակիր։