Աղբյուր. Սպերցյանը համաձայնել է տեղափոխվել Ալ-Ահլի

Հայաստանի հավաքականի և «Կրասնոդարի» կիսապաշտպան և ավագ Էդուարդ Սպերցյանը համաձայնվել է տեղափոխվել Սաուդյան Արաբիայի «Ալ-Ահլի» ակումբ, հաղորդում է «Մաշ նա սպորտե» Telegram ալիքը: Աղբյուրի փոխանցմամբ՝ կողմերի միջև բանակցությունները գտնվում են վերջնական փուլում: Հայաստանի հավաքականի խաղացողին առաջարկվել է երեք տարվա պայմանագիր՝ տարեկան մոտ 10 միլիոն եվրո աշխատավարձով՝ առանց բոնուսների։

Նշվում է, որ խաղացողը գոհ է եղել սաուդյան ակումբի ֆինանսական պայմաններից և ամբիցիաներից: Սակայն «Կրասնոդարի» ղեկավարությունը չի ցանկանում բաց թողնել իր առաջատարին, որի պայմանագիրը նախատեսված է մինչև 2029 թվականը: Այս հարցը լուծելու համար Սպերցյանը ցանկանում է միջազգային խաղերով պայմանավորված դադարից հետո անձամբ հանդիպել ակումբի սեփականատեր Սերգեյ Գալիցկիի հետ և համոզել նրան ավելի հարմարվողական լինել։

Ավելի վաղ՝ Ռուսաստանի գավաթի եզրափակչում «Սպարտակից» կրած պարտությունից հետո, Սպերցյանը հայտարարել էր, որ այս խաղը կարող էր լինել իր վերջինը «Կրասնոդարի» կազմում։

2025/26 մրցաշրջանում Սպերցյանը «Կրասնոդարի» կազմում անցկացրել է 30 խաղ՝ խփելով 13 գոլ և կատարելով 16 գոլային փոխանցում։ 2025/26 մրցաշրջանի առաջին կեսից հետո կիսապաշտպանը երկրպագուների կողմից ճանաչվել էր «Կրասնոդարի» տարվա լավագույն խաղացող։

«Ալ-Ահլին» 2025/26 մրցաշրջանում Սաուդյան Արաբիայի Պրեմիեր լիգայում զբաղեցրել է երրորդ տեղը և նաև հաղթել է Ասիայի Չեմպիոնների լիգայում։