Արտասահմանյան հավաքներ․ Չանչարևիչն այցելել է Ալաշկերտին, Նոան առաջին խաղն է անցկացրել

Այսօր 15:00

Արտասահմանյան հավաքներ․ Չանչարևիչն այցելել է Ալաշկերտին, Նոան առաջին խաղն է անցկացրել

Հայկական թիմերն այս օրերին ուսումնամարզական հավաքներ են անցկացնում արտասահմանում՝ նախապատրաստելով եվրագավաթային հերթական մրցաշրջանին: Առաջարկում ենք ծանոթանալ վերջին իրադարձություններին:

Հայաստանի չեմպիոն «Արարատ-Արմենիան» շարունակում է մարզումները հունգարական Շոպրոնում: Թիմը հավաքի առաջին ստուգողական խաղում ոչ-ոքի՝ 1:1 հաշվով էր ավարտել հանդիպումը Սլովենիան ներկայացնող «Մուրայի» (Սլովենիա) հետ: Երևանյան թիմի միակ գոլը խփել էր Հուգո Օլիվեյրան։

Մանուել Տուլիպայի թիմին Հունգարիայում միացել է 25-ամյա բրազիլացի կենտրոնական պաշտպան Լուիս Ֆելիպեն:

Հաջորդ հանդիպումն «Արարատ-Արմենիան» կանցկացնի հունիսի 27-ին՝ մրցելով սերբական «Վոժվոդինայի» հետ:

Հիշեցնենք՝ Չեմպիոնների լիգայի որակավորման առաջին փուլում «Արարատ-Արմենիան» կմրցի Լատվիայի չեմպիոն «Ռիգայի» հետ։ Երևանյան ակումբը առաջին հանդիպումը կանցկացնի սեփական հարկի տակ։ Խաղերը նախատեսված են հուլիսի 7/8-ին, պատասխան խաղերը՝ 14/15-ին։

Հայաստանի գավաթակիր «Նոան» ուսումնամարզական հավաք է անցկացնում Սլովենիայում: Հավաքի առաջին ստուգողական խաղում Սանդրո Պերկովիչի սաները մրցել են տեղի «Կոպեր» թիմի հետ և 2 անպատասխան գնդակ ընդունել սեփական դարպասը: «Նոային» կազմն այս ընթացքում համալրել է Հայաստանի Մ-21 հավաքականի դարպասապահ Դավիթ Դավթյանը: 20-ամյա դարասապահը «Նոա» է տեղափոխվել ԲԿՄԱ-ից տրանսֆերային համաձայնագրով:

«Նոան» Կոնֆերենցիաների լիգայում պայքարը կսկսի որակավորման երկրորդ փուլից: «Նոայի» մրցակիցը կլինի Մոլդովան ներկայացնող «Զիմբրուն»: Հանդիպումները կկայանան հուլիսի 23-ին և 30-ին:

«Ալաշկերտը» հունիսի 18-ից հուլիսի 2-ն ուսումնամարզական հավաք է անցկացնում Սերբիայի Ստարա Պազովա քաղաքում։ Հավաքի ընթացքում թիմն առաջին ստուգողական խաղը կանցկացնի այսօր՝ մրցելով Բելգրադը ներկայացնող «ՕՖԿ Բեոգրադ» թիմի հետ:

Բայց, մինչ այդ Վահե Գևորգյանը թիմը նաև մի քանի համալրում է ունեցել: Թիմին են միացել 18-ամյա կիսապաշտպան Տոգոլա Դաուդան. մալիացի ֆուտբոլիստը նախկինում մարզվել է «Վիստա» ֆուտբոլային կրթական կենտրոնում, ինչպես նաև ձախ վինգեր Դոմի Ժորես Մասումուն:23-ամյա ֆուտբոլիստը 3 հանդիպում է անցկացրել Կոնգոյի ազգային հավաքականի կազմում:

Համալրվել է նաև «Ալաշկերտի» մարզչական շտաբը: Թիմին է միացել դարպասապահների մարզիչ Մարտիկ Մկրտումյանը: 39-ամյա մասնագետն աշխատել է «Գանձասարում», «Նորավանքում», ԲԿՄԱ-ում, Հայաստանի մինչև 19 ու մինչև 21 տարեկանների հավաքականում։

Սերբիայում ընթացող հավաքի ընթացքում «Ալաշկերտի» ֆուտբոլիստներին այցելել է նաև թիմի նախկին դարպասապահ Օգնյեն Չանչարևիչը:

Կոնֆերենցիաների լիգայի որակավորման առաջին փուլում «Ալաշկերտը» կմրցի ղազախական «Ելիմայի» հետ։ Առաջին խաղը թիմը կանցկացնի սեփական հարկի տակ։ Որակավորման առաջին փուլի առաջին խաղերը կկայանան հուլիսի 9-ին, պատասխան խաղերը՝ 1 շաբաթ անց։

Եվրագավաթային մրցաշրջանին Սլովենիայում է նախապատրաստվում նաև Երևանի «Փյունիկը»: Հավաքի առաջին ընկերական խաղում թիմը մրցել է Սլովենիայի գավաթակիր «Ալյումինի» հետ և ոչ-ոքի՝ 2:2 հաշվով ավարտել հանդիպումը:

Սլովենիայի Չատեժ օբ Սավի քաղաքում ընթացող հավաքը մեկնարկել է հունիսի 18-ին և կտևի մինչև հուլիսի 2-ը:

Կոնֆերենցիաների լիգայի խաղարկության որակավորման առաջին փուլի վիճակահանությամբ «Փյունիկի» մրցակիցը Մալթայի «Մարսաշլոկ» թիմն է: Դիմակայության առաջին խաղը կկայանա հուլիսի 9-ին, մրցակցի հարկի տակ, պատասխան հանդիպումը՝ հուլիսի 16-ին, Երևանում։