Պետք է փորձենք օգտվել նրանց թույլ կողմերից և հասնել հաղթանակի. Շաղոյանը՝ Ռիգայի հետ ՉԼ խաղի մասին
Չեմպիոնների լիգայի որակավորման առաջին փուլի տնային խաղին ընդառաջ կայացել է «Արարատ-Արմենիա» – «Ռիգա» հանդիպման նախախաղային մամուլի ասուլիսը, որին գլխավոր մարզչի հետ միասին մասնակցել է նաև Ժիրայր Շաղոյանը:
– Թիմը համալրվել է նոր ֆուտբոլիստներով։ Ինչպե՞ս է ընթանում նրանց ադապտացումը, և ի՞նչ են նրանք բերել թիմ։
– Ունենք նոր ֆուտբոլիստներ, իսկապես շատ որակյալ խաղացողներ են։ Կարող եմ ասել, որ նրանք համապատասխանում են մեր խաղաոճին և մեծ օգուտ կարող են տալ թիմին։ Ամեն ինչ կախված է նրանից, թե որքան արագ կկարողանանք փոխանցել մեր խաղային փիլիսոփայությունը և որքան արագ նրանք կհարմարվեն թիմին։ Այն, ինչ ես տեսել եմ, թույլ է տալիս վստահ ասել, որ նրանք շատ արագ կադապտացվեն։
– Թիմը որքանո՞վ է պատրաստ առաջիկա ստուգատեսին։
– Լավ ուսումնամարզական հավաք անցկացրինք Հունգարիայում։ Ընկերական հանդիպում ունեցանք նաև Սերբիայի բարձրագույն խմբի թիմերից մեկի հետ։ Փորձել ենք հնարավորինս լավ պատրաստվել և առավելագույն լրջությամբ մոտենալ այս կարևոր հանդիպմանը։
– Ի՞նչ կարող եք ասել մրցակցի մասին։
– Իհարկե, ուսումնասիրել ենք նրանց։ Գնդակով շատ լավ են խաղում, սակայն, ինչպես ցանկացած թիմ, ունեն նաև իրենց ուժեղ և թույլ կողմերը։ Մենք պետք է փորձենք օգտվել նրանց թույլ կողմերից և հասնել հաղթանակի։
– Ինչպե՞ս եք գնահատում ձեր ներկայիս մարզավիճակը։
– Գնահատում եմ լավ։ Այս անգամ երկար դադար չենք ունեցել, ինչպես ձմռանը։ Բացի այդ, խաղացել ենք նաև Ազգային հավաքականում: Այդ պատճառով կարծում եմ, որ բավարար մարզավիճակում ենք:
