Ըմբշամարտի Մ17 ԱԱ. Արարատ Ավետիսյանն ու Վազգեն Մնացականյանը դուրս են եկել կիսաեզրափակիչ

Հունահռոմեական ոճի ըմբիշներ 48 կգ քաշային Արարատ Ավետիսյանը և 65 կգ քաշային Վազգեն Մնացականյանը դուրս են եկել Բաքվում ընթացող ըմբշամարտի Մ17 տարեկանների աշխարհի առաջնության կիսաեզրափակիչ և այսօր երեկոյան կպայքարեն եզրափակչի ուղեգրի համար:

Արարատ Ավետիսյանը 48 կգ քաշայինների քառորդ եզրափակչում 9:3 հաշվով առավելության է հասել ուզբեկստանի ներկայացուցիչ Ջավահիր Շարիֆբոևի նկատմամբ: 1/8 եզրափակչում Ավետիսյանը քամբեք էր կատարել Մեքսիկայի ներկայացուցիչ Հեկտոր Ագիլեր Ռոդրիգեսի հետ գոտեմարտում՝ 14:7 հաշվով հաղթանակ տանելով:

Վազգեն Մնացականյանը քառորդ եզրափակչում գոտեմարտել է խորվաթ Լովրո Վիդովիչի հետ և 4:3 հաշվով հաղթանակ տարել:

Մնացականյանը պայքարը սկսել է որակավորման փուլից, որտեղ 7:4 հաշվով վերջին վայրկյաններին առավելության է հասել Իրանի ներկայացուցչի նկատմամբ: 1/8 եզրափակչում հայ ըմբիշը 5:2 հաշվով հաղթել է Ղրղզստանի ներկայացուցչի նկատմամբ:

Հայսատանի մյուս ներկայացուցիչ Եվրոպայի Մ17 առաջնության ոսկե մեդալակիր Վահե Հովեյանը (80 կգ) քառորդ եզրափակչում տուշեով պարտվել է լիտվացի Բենեկդիտաս Բուբելևիչիուսին: Եթե վերջինս հասնի եզրափակիչ, Հովեյանը սփոփիչ գոտեմարտ կանցկացնի:

110 կգ քաշային Խաչիկ Խաչատրյանը քառորդ եզրափակչում գոտեմարտել է ԱՄՆ ներկայացուցչի հետ և զիջել մրցակցին: Նա ևս սփոփիչ գոտեմարտ կանցկացնի, եթե ամերիկացի Բրունո Պալոնեն դուրս գա եզրափակիչ: