Հայտնի են ազատոճայինների մրցակիցները ԵԱ-ում

Բրատիսլավայում վաղը կմեկնարկի ըմբշամարտի Եվրոպայի առաջնությունը։ Այսօր կայացել է վիճակահանությունը։

Հայտնի են ձևավորված զույգերը։

Այսպիսով, 57 կգ քաշային ըմբիշ Մանվել Խնձրցյանը պայքարը կսկսի քառորդ եզրափակիչից, որտեղ կմրցի որակավորման փուլում Իվայնո Միլենով Տիսով (Բուլղարիա)-Նաչին Մոնգուշ (հանդես է գալիս UWW-ի դրոշի ներքո) զույգի հաղթողի հետ։

Եվրոպայի գործող չեմպիոն Արսեն Հարությունյանը պայքարը կսկսի որակավորման փուլից։ 61 կգ ըմբիշի մրցակիցը Ստիլյան Յանչև Իլևն է։

65 կգ քաշային կարգում Հայաստանի ներկայացուցիչ, Աշխարհի գավաթի հաղթող Վազգեն Թևանյանի մրցակիցը 1/8 եզրափակիչում UWW-ի դրոշի ներքո հանդես եկող Իսլամ Հուսեինովն է։

70 կգ քաշային Արման Անդրեասյանի մրցակիցը որակավորման փուլում լեհ Մատեուշ Լուչինսկին է։

74 կգ քաշային Նարեկ Հարությունյանը նույնպես պայքարը կսկսի որակավորման փուլից։ Հարությունյանի մրցակիցը Հունգարիայի ներկայացուցիչ Մուրադ Կուրամագոմեդովն է։

Հայկ Պապիկյանը, որը հանդես կգա 79 կգ քաշային կարգում, որակավորման փուլում կմրցի ուկրաինացի Վասիլ Միխայլովի հետ։

86, 92 և 125 կգ քաշային կարգերում Հայաստանը ներկայացուցիչ չունի, իսկ 97 կգ քաշային կարգում հանդես եկող Գուրգեն Սիմոնյանը կմրցի Մագոմեդ Կուրբանովի հետ, որը հանդես է գալիս UWW-ի դրոշի ներքո։