Ամոյանն ու Ասլանյանը եզրափակիչում են․ Խաչատրյանը կպայքարի բրոնզի համար (տեսանյութ)

Բրատիսլավայում ընթացող ըմբշամարտի Եվրոպայի առաջնությունում այսօր պայքարը սկսեցին հունահռոմեականները։

55 կգ քաշային Մանվել Խաչատրյանը քառորդ եզրափակիչում 9։0 հաշվով հաղթելով թուրք ըմբիշին, դուրս եկավ կիսաեզրափակիչ, որտեղ 1։5 հաշվով զիջեց աշխարհի քառակի չեմպիոն, ադրբեջանցի Էլդանիզ Ազիզլիին ու կպայքարի բրոնզե մեդալի համար։

63 կգ քաշային Կարեն Ասլանյանը, որի 30 վայրկյան էր անհրաժեշտ եղել կիսաեզրափակիչ դուրս գալու համար, այստեղ ևս պայքարն ավարտեց ժամանակից շուտ՝ 8։0 հաշվով հաղթելով ուկրաինացի Անդրեյ Սեմենչուկին։ Եզրափակիչում Ասլանյանի մրցակիցը թուրք Քերեմ Քամալն է։

77 կգ քաշային Մալխաս Ամոյանն էլ, նախ 9։0 հաշվով առավելության հասավ լեհ Մատեուշ Բերնատեկի, ապա 7-2 Մոլդովայի ներկայացուցիչ Ալեքսանդրու Սոլովեիի նկատմամբ։ Կիսաեզրափակիչում Ամոյանի մրցակիցը Բուլղարիան ներկայացնող Հայկ Մնացականյանն էր։ Օլիմպիական խաղերի բրոնզե մեդալակիր Ամոյանը առավելության հասավ 5։1 հաշվով՝ դուրս գալով եզրափակիչ, որտեղ նրա մրցակիցը վրացի Ռամազ Զոիձեն է։

Տեսանյութերը՝ այստեղ։

Այսպիսով, վաղը Եվրոպայի չեմպիոնի կոչման համար կպայքարեն 2 հայ ըմբիշ։ Ավելի վաղ պայքարից դուրս մնացած Կարեն Խաչատրյանն ու Դավիթ Օվասապյանն էլ կանցկացնեն սփոփիչ գոտեմարտեր՝ բրոնզե մեդալի համար։

Վաղը պայքարի մեջ կմտնեն Կարապետ Մանվելյանը, Սլավիկ Գալստյանը, Շանթ Խաչատրյանը, Սամվել Գրիգորյանն ու Արթուր Ալեքսանյանը։