Ըմբիշ Մանվել Խաչատրյանը պարտվեց Եվրոպայի առաջնության բրոնզե մեդալի համար պայքարում

Հունահռոմեական ոճի ըմբիշ, 55 կգ քաշային Մանվել Խաչատրյանը ցավալի պարտություն է կրել Սլովակիայում ընթացող Եվրոպայի առաջնության բրոնզե մեդալի համար պայքարում։

Վճռորոշ գոտեմարտում Խաչատրյանը 1։3 հաշվով զիջել է վրացի Վախթանգ Լոլուային։

Մանվել Խաչատրյանը պայքարը սկսել էր քառորդ եզրափակչից, որտեղ 9:0 հաշվով ժամանակից շուտ առավելության էր հասել թուրք Էմրե Մուտլուի նկատմամբ։ Կիսաեզրափակչում, սակայն, Եվրոպայի բրոնզե մեդալակիրը 1։5 հաշվով զիջել էր աշխարհի քառակի չեմպիոն, Եվրոպայի կրկնակի չեմպիոն, ադրբեջանցի Էլդենիզ Ազիզլիին։

Այսօր ավելի վաղ ԵԱ-ի կիսաեզրափակչում պարտվել էր նաև Օլիմպիական խաղերի ոսկե, կրկնակի արծաթե և բրոնզե մեդալակիր, աշխարհի քառակի ու Եվրոպայի 7-ակի չեմպիոն Արթուր Ալեքսանյանը։

Քիչ անց Եվրոպայի առաջնության չեմպիոնության համար կպայքարեն Մալխաս Ամոյանն ու Կարեն Ասլանյանը։