Ադրբեջանը հայ մարզիկներին հրավիրել է մասնակցելու ԱՊՀ 3-րդ խաղերին. ՀՀ-ից ասում են՝ կքննարկեն և որոշում կկայացնեն
Ադրբեջանը Հայաստանին հրավեր է ուղարկել՝ մասնակցելու սեպտեմբերի 28-ից հոկտեմբերի 8-ը կայանալիք ԱՊՀ 3-րդ խաղերին, որոնք անցկացվելու են օկուպացված Ստեփանակերտում և մի շարք այլ քաղաքներում, գրում է Tert.am-ը:
«Հայաստանը դեռ տեղեկատվություն չի տրամադրել Ադրբեջանում կազմակերպվելիք ԱՊՀ երկրների 3-րդ խաղերին մասնակցության վերաբերյալ»,- նշել է ԱՊՀ խաղերի ազգային կազմկոմիտեի ներկայացուցիչ Այգուլ Աղաևան։
Օկուպացված Ստեփանակերտից բացի, Խաղերն անցկացվելու են Գյանջայում (Գանձակ), Եվլախում, Մինգեչևիրում, Գաբալայում, Շեքիում, Գոյգոլում։
Կառավարության նիստից հետո՝ լրագրողների հետ զրույցում, ԿԳՄՍ նախարար Ժաննա Անդրեասյանն էլ այսօր ասել է, որ խաղերի մասնակցության հարցը կքննարկվի:
«Առաջիկայում կքննարկենք և որոշում կկայացնենք։ Դա կախված է տարբեր հանգամանքներից, այդ թվում՝ անվտանգության միջոցառումներից։ Եվ կարծում եմ՝ որոշումները պետք է կայացվեն ամբողջական ինֆորմացիայի պարագայում: Կքննարկենք և ըստ այդմ կորոշենք»,-ասել է նա:
