Չարենցավանի համայնքապետարանը Վանի երկրպագուներին հրավիրում է Նոայի դեմ գավաթային խաղին
Չարենցավանի համայնքապետարանի ֆեյսբուքյան պաշտոնական էջը «Վանի» երկրպագուներին կոչ է արել գալ մարզադաշտ՝ ոգևորելու թիմին «Նոայի» դեմ Հայաստանի գավաթի խաղարկության պատասխան խաղում։
«Սիրելի՛ մարզասերներ,
Ապրիլի 30-ին «Վան» ֆուտբոլային ակումբն առավել քան մեր աջակցության կարիքն ունի։
Ժամը 15:00-ին Չարենցավանի քաղաքային մարզադաշտում կհյուրընկալենք «Նոա» ֆուտբոլային ակումբին։
Սա Հայաստանի գավաթի խաղարկության կիսաեզրափակիչ պատասխան հանդիպումն է, որն առանցքային նշանակություն ունի մեր ակումբի համար։ Եկե՛ք միասին ոգեշնչենք մեր ֆուտբոլիստներին և քայլենք դեպի հաղթանակը»,-ասված է հայտարությունում։
Հիշեցնենք, որ առաջին խաղում Վահե Գևորգյանի գլխավորած թիմը դրամատիկ պայքարում զիջել էր 0։2 հաշվով։ Վահե Գևորգյանը հետխաղային մամուլի ասուլիսի ընթացքում նշել էր, որ պատասխան խաղում թեժ պայքար է խոստանում «Նոային»։
