Ակումբում ինձ շատ ծանոթ դեմքերը ոգևորեցին, որ միանամ այս նախագծին. Նոայի բոսնիացի նորեկ

Պորտուգալիայի Բարձրագույն լիգայի «Կասա Պիա» ակումբից «Նոայի» շարքերն է համալրել բոսնիացի կենտրոնական պաշտպան Ներմին Զոլոտիչը։

Թիմին միանալուց հետո ֆուտբոլիստը կիսվել է իր տպավորություններով։

«Թե՛ ակումբի հավակնությունները, թե՛ գլխավոր մարզչի աշխատանքը, թե՛ ակումբում ինձ շատ ծանոթ դեմքերը ոգևորեցին, որ միանամ այս նախագծին։ Մեծ հույս ունեմ, որ կօգնեմ «Նոային» հասնել առաջադրված նպատակներին»,- ֆուտբոլիստի խոսքերն է մեջբերում ակումբի մամուլի քարտուղարությունը:



31-ամյա պաշտպանը հանդես է եկել բոսնիական «Ժելյեզնիչար», բելգիական «Գենտ», ԿՍՎ «Ռոեսելարե», խորվաթական ՆԿ «Իստրա» ակումբներում։ Նրա վերջին ակումբը եղել է պորտուգալական «Կասա Պիան», որտեղ հանդես է եկել վերջին 3 մրցաշրջաններում։

Բոսնիացի խաղացողը դարձել է Բելգիայի Բարձրագույն լիգայի չեմպիոն «Գենտի» կազմում, ինչպես նաև երկուական անգամ հռչակվել է Բոսնիա և Հերցեգովինայի չեմպիոն և գավաթակիր։ 81 հանդիպում է անցկացրել Բելգիայի Չելենջեր Պրո լիգայում, 67 հանդիպման՝ Պորտուգալիայի Բարձրագույն լիգայում։ «Նոայի» նորեկը նաև անցկացրել է 1 հանդիպում Բոսնիա և Հերցեգովինայի հավաքականի մարզաշապիկով։

Նշենք, որ սա «Նոայի» երրորդ համալրումն էր այս տրանսֆերային պատուհանի ընթացքում Ջեյմս Սանթոսից և Բրունո Ալմեյդայից հետո։