Արարատ-Արմենիան Հայաստանի գավաթի խաղարկության եզրափակիչում է

Հայաստանի գավաթի խաղարկության կիսաեզրափակիչի պատասխան խաղում «Արարատ-Արմենիան» հետխաղյա 11-մետրանոցներով հաղթեց «Փյունիկին»՝ դուրս գալով եզրափակիչ։

Դիմակայության առաջին խաղում հաղթել էր Վարդան Մինասյանի գլխավորած թիմը՝ 2։0 հաշվով։ Պատասխան խաղի հիմնական ժամանակում ուժեղ էին «փյունիկցիները», որոնք առավելության հասան նույն հաշվով։ 39-րդ րոպեին խաղի հաշիվը բացեց Անտոն Բրատկովը, իսկ 52-րդ րոպեին Ժոաո Կեյրուշը գրավեց սեփական դարպասը՝ դիմակայությունում վերականգնելով հաշվի հավասարությունը։

Խաղը տեղափոխվեց լրացուցիչ ժամանակ, որտեղ գոլեր չարձանագրվեցին ու ամեն ինչ որոշվեց հետխաղյա 11-մետրանոց հարվածաշարում, որտեղ ավելի դիպուկ էին Հայաստանի գործող գավաթակիրները։

Մարիուս Նուբիսսին, Հովհաննես Հարությունյանը, Ժիրայր Շաղոյանն ու Խուլիո Բուենոն անշեղորեն իրացրեցին վճռորոշ հարվածներն, իսկ «Փյունիկից» իրենց նախկին թիմակցի՝ Հենրի Ավագյանի պաշտպանած դարպասւ կարողացան գրավել Էդգար Մալաքյանն ու Սոլոմոն Ոդուն։ Տարոն Ոսկանյանի հարվածը հետ մղեց Ավագյանը, իսկ Սերգեյ Վակուլենկոյի հարվածից հետո գնդակը դիպավ դարպասաձողին։

«Արարատ-Արմենիան» իր մրցակցին կիմանա վաղը։ «Վան»-«Նոա» զույգը կորոշի եզրափակիչի մյուս ուղեգրի ճակատագիրը։ Այդ դիմակայության առաջին խաղում հաղթել էր «Նոան»՝ 2։0 հաշվով։