Իտալական ակումբը հետաքրքրված է Թիկնիզյանի ծառայություններով

Match TV-ի փոխանցմամբ՝ «Լոկոմոտիվի» և Հայաստանի հավաքականի ֆուտբոլիստ Նաիր Թիկնիզյանը գրավել է իտալական «Վերոնա» ակումբի ուշադրությունը։ Խաղացողի ներկայացուցիչը և ռուսական ակումբը կապի մեջ են եղել հնարավոր տրանսֆերի վերաբերյալ։

Այս մրցաշրջանում 25-ամյա Թիկնիզյանը ՌՊԼ-ում անցկացրել է 23 խաղ, որոնցում խփել է 2 գոլ և կատարել մեկ գոլային փոխանցում։ Ռուսաստանի գավաթում պաշտպանը մասնակցել է 10 խաղի և կատարել 3 գոլային փոխանցում։

Match TV-ի մի քանի աղբյուրների համաձայն, «Վերոնան» խնդիր ունի ամառային տրանսֆերային պատուհանի ժամանակ ձեռք բերել ձախ պաշտպան, իսկ Թիկնիզյանը իտալացիների ցանկում է։ Այս պահին «Լոկոմոտիվի» և «Վերոնայի» միջև լիարժեք բանակցությունների մասին խոսք չկա, չնայած որ և՛ ռուսական ակումբը, և՛ ֆուտբոլիստն ինքը հետաքրքրված են հնարավոր տրանսֆերով՝ ողջամիտ գումարի դիմաց։

«Սևիլիան» նույնպես շարունակում է հետաքրքրված լինել Թիկնիզյանով, սակայն իսպանական ակումբ տեղափոխվելու հետ կապված իրավիճակը չի փոխվել այն բանից հետո, երբ անդալուսցիները 2024 թվականի ամռանը պաշտոնական առաջարկ արեցին «Լոկոմոտիվին» անվճար վարձակալության և կամավոր գնման հնարավորությամբ։