ՉԼ-ին ընդառաջ Նոան ցանկացել է հրավիրել Սպերցյանին և Տիկնիզյանին

Metaratings.ru-ի փոխանցմամբ՝ «Նոան» հետաքրքրություն է ցուցաբերել «Լոկոմոտիվի» պաշտպան Նաիր Տիկնիզյանի և «Կրասնոդարի» կիսապաշտպան Էդուարդ Սպերցյանի նկատմամբ՝ Չեմպիոնների լիգայի համար թիմի կազմը ուժեղացնելու համար։

Միաժամանակ հաղորդվում է, որ հայկական ակումբը որևէ պաշտոնական առաջարկ չի արել խաղացողներին, բայց ֆուտբոլիստների ներկայացուցիչների հետ եղել են շփումներ: Սակայն Սպերցյանը և Տիկնիզյանը հրաժարվել են տեղափոխությունից։

«Նոան», հիշեցնենք, ավարտվող մրցաշրջանում նվաճել է Հայաստանի չեմպիոնությունը և ապահովել է իր տեղը Չեմպիոնների լիգայի որակավորման առաջին փուլում:

Էդուարդ Սպերցյանը «Կրասնոդարի» սան է։ «Ցլերի» կազմում կիսապաշտպանը խաղացել է 142 խաղ, խփել 43 գոլ և կատարել 30 գոլային փոխանցում։ Transfermarkt-ի տվյալներով՝ ֆուտբոլիստի շուկայական արժեքը կազմում է 20 միլիոն եվրո։

Նաիր Տիկնիզյանը «Լոկոմոտիվում» է խաղում 2021 թվականից։ Այս մրցաշրջանում նա բոլոր մրցաշարերում անցկացրել է 33 խաղ, խփել է երկու գոլ և կատարել չորս գոլային փոխանցում։ Transfermarkt-ի տվյալներով՝ ֆուտբոլիստի արժեքը կազմում է 6 միլիոն եվրո։