Կանեմ ամեն ինչ, որպեսզի մեր թիմն ուրախացնի մեր երկրին ու երկրպագուներին․ ԲԿՄԱ-ի ֆուտբոլիստները՝ առաջին անգամ հավաքական հրավիրվելու մասին

ԲԿՄԱ-ի ֆուտբոլիստներ Դանիել Աղբալյանն ու Դավիթ Հակոբյանն կիսվել են առաջին անգամ Հայաստանի ազգային հավաքական հրավիրվելու տպավորություններով։

«Նախ և առաջ, ուզում եմ շնորհակալություն հայտնել ազգային հավաքականի գլխավոր մարզիչին և մարզչական շտաբին հրավերի համար։ Ես շատ ուրախ եմ և կանեմ ամեն ինչ, որպեսզի մեր թիմը հասնի դրական արդյունքների և ուրախացնի մեր երկրին ու մեր երկրպագուներին», - ասել է Դանիել Աղբալյանը։

«Հայաստանի ազգային հավաքական հրավիրվելը չափազանց պարտավորեցնող է ինձ համար, ուստի մեծ պատասխանատվությամբ եմ մոտենում ազգային հավաքականում ներկայանալու հնարավորությանը։ Պատրաստ եմ իմ բոլոր ջանքերը գործադրել ազգային հավաքականում պատշաճ ներկայանալու և լավ արդյունքներ գրանցելու համար» , - նշել է Դավիթ Հակոբյանը։

Հիշեցնենք, որ Հայաստանի ազգային հավաքականը հունիսի 6-ին ու 9-ին կանցկացնի ընկերական 2 հանդիպում՝ Կոսովոյի ու Մոնտենեգրոյի ընտրանիների դեմ։ Հավաքականի հայտացուցակին ծանոթացեք այստեղ։