ՀՊԼ-ի ամենաթանկարժեք ֆուտբոլիստները

Transfermarkt պարբերականը թարմացրել է Հայաստանի Պրեմիեր լիգայում հանդես եկող ֆուտբոլիստների տրանսֆերային արժեքները։

ՀՊԼ-ում հանդես եկող ամենաթանկարժեք ֆուտբոլիստը «Նոայի» հարձակվողական ոճի կիսապաշտպան Իմրան Ուլադ Օմարն է։ 27-ամյա ֆուտբոլիստի տրանսֆերային արժեքը գնահատվում է 750 հազար եվրո, ընդ որում, նրա արժեքը նվազել է։ Նույն արժեքն ունի նաև Հայաստանի չեմպիոնի մեկ այլ ներկայացուցիչ՝ Հելդեր Ֆերեյրան։ 

Լավագույն եռյակը եզրափակում է Յան Էտեկին՝ կրկին «Նոայից»։ Նրա տրանսֆերը կայքը գնահատում է 700 հազար եվրո։ Նույն չափ են գնահատվում նաև Գուստավո Սանգարեի ու Էրալդո Չինարիի տրանսֆերային արժեքները, սակայն վերջինս, ըստ sportmedia-ի տեղեկությունների, հեռացել է թիմից։

650 հազար եվրո տրանսֆերային արժողությամբ ՀՊԼ-ի ավարտված մրցաշրջանի լավագույն ռմբարկուն Գոնսալո Գրեգորիոն ևս տասնյակում է։  600 հազար եվրո էլ գնահատվում են Ներմին Զոլոտիչն ու «Փյունիկի» հենակետային Դանիլ Կուլիկովի տրանսֆերային արժեքները։

Հայ ամենաթանկարժեք ֆուտբոլիստի տրանսֆերային արժեքը գնահատվում է 500 հազար եվրո։ Այդքան են գնահատվում «Փյունիկի» ու Հայաստանի ազգային հավաքականի ավագ Վարազդատ Հարոյան ու «Նոայի» պաշտպան Սերգեյ Մուրադյանի տրանսֆերային արժեքները։ Նրանց հաջորդում է Կամո Հովհաննիսյանը՝ 400 հազար եվրո տրանսֆերային արժողությամբ։