Հունահռոմեական ոճի ըմբիշները 3 ոսկե և 1 բրոնզե մեդալ են նվաճել Էստոնիայի միջազգային մրցաշարում
Հայաստանի հունահռոմեական ոճի ըմբշամարտի հավաքականի ներկայացուցիչները 3 ոսկե և 1 բրոնզե մեդալ են նվաճել Էստոնիայի մայրաքաղաք Տալլինում անցկացված Կրիստիան Պաուլսենի անվան հուշամրցաշարում:
Հուշամրցաշարի հաղթողներ են դարձել Կարեն Խաչատրյանը (87կգ), Հայկ Խլոյանը (97 կգ) և Դավիթ Օվասապյանը (130 կգ)։
Հայաստանի վերջին ներկայացուցիչ, 82 կգ քաշային Սամվել Գրիգորյանն արժանացել է բրոնզե մեդալին:
Հիշեցնենք՝ Հայաստանի հունահռոմեական ոճի ըմբշամարտի հավաքականն Արմեն Բաբալարյանի գլխավորությամբ հունվարի 15-ից մրցաշրջանի նախապատրաստական առաջին ուսումնամարզական հավաքը մեկնարկել է Ծաղկաձորում, ապա այն շարունակել Օլիմպավանում:
Մարտի առաջին օրերին հավանաբար կանցկացվեն ստուգողական գոտեմարտեր և աչքի ընկածներով կկազմվի գլխավոր թիմը, որը կմասնակցի Սլովակիայում ապրիլի 7-12-ը նախատեսված Եվրոպայի առաջնությանը:
