Խաչանովն առաջադիմել է, Ավանեսյանը նույն տեղում է․ Թենիսի թարմացված դասակարգման աղյուսակը

Հրապարակվել է թենիսի տղամարդկանց ու կանանց վարկանիշային թարմացված աղյուսակը։

Տղամարդկանց դասակարգման աղյուսակում առաջատարը իտալացի Յանիկ Սիներն է (10430)։ 2-րդը Ռոլան Գարոսի հաղթող, իսպանացի, Կառլոս Ալկարասն է (9300), իսկ լավագույն եռյակը եզրափակում է Գերմանիան ներկայացնող Ալեքսանդր Զվերևը (6500)։ Հալեում կայացած մրցաշարի նորընծա հաղթող, Ղազախստանը ներկայացնող Ալեքսանդր Բուբլիկը թոփ 50-ում գրանցել է ամենամեծ աճը՝ առաջադիմելով 15 հորիզոնականով և այժմ 30-րդն է 1675 միավորով։

Ռուսաստանը ներկայացնող հայ թենիսիստ Կարեն Խաչանովը առաջադիմել է 3 հորիզոնականով ու այժմ 2240 վարկանիշային միավորով 19-րդն է։

Կանանց դասակարգման աղյուսակի առաջատարը Բելառուսի ներկայացուցիչ Արինա Սաբալենկան է (11640)։ 2-րդ տեղում Ռոլան Գարոսի հաղթող Կոկո Գաուֆն է (7899), իսկ 3-րդ հորիզոնականում ԱՄՆ-ն ներկայացնող Ջեսիկա Պեգուլան (6048)։

Հայաստանը ներկայացնող Էլինա Ավանեսյանը պահպանել է իր դիրքն ու 1150 միավորով 48-րդ տեղում է։