Արամ Ոսկանյանը հեռացել է Սյունիքի գլխավոր մարզչի պաշտոնից
Հուլիսի 1-ին տեղի է ունեցել «Սյունիքի» ղեկավարության և մարզչական անձնակազմի հանդիպումը։ Տեղեկացնում է ակումբի մամուլի ծառայությունը։
«Հաշվի առնելով այն հանգամանքը, որ Սյունիք ՖԱ-ն որոշել է 2025/26 թթ․ մրցաշրջանում մնալ Առաջին խմբում, ակումբը և գլխավոր մարզիչ Արամ Ոսկանյանը, գլխավոր մարզիչի առաջին օգնական Արթուր Ասոյանը երկկողմ համաձայնությամբ խզել են աշխատանքային պայմանագրերը, որոնք նախատեսված էին մինչեւ 2026 թվականի մայիսի 31-ը։ Ոսկանյանը և նրա մարզչական շտաբը պատվով ընդունել են առկա մարտահրավերները և կարողացան կարճ ժամկետում ստեղծել ամուր թիմ, որը պայքարեց նախորդ երկու մրցաշրջաններում և երկու տարի անընդմեջ զբաղեցրեց երկրորդ հորիզոնականն Առաջին խմբում՝ այս տարի նվաճելով նաև Պրեմիեր լիգայի ուղեգիր», - ասված է ակումբի տարածած հայտարարության մեջ։
Հիշեցնենք, որ Ոսկանյանը պաշտոնը ստանձնել էր 2023-ի ամռանը։
«Սյունիքը» շնորհակալություն է հայտնել Արամ Ոսկանյանին և Արթուր Ասոյանին պրոֆեսիոնալիզմի, կատարած աշխատանքի, նվիրվածության համար և մաղթել նոր հաջողություններ կարիերայում։
