Ինտերը հաղթեց Ֆիորենտինային, Մխիթարյանը փոխարինվել է

Իտալիայի Ա Սերիայի 2024/2025 մրցաշրջանի 24-րդ տուրում Միլանի «Ինտերը» սեփական հարկի տակ ընդունել է «Ֆիորենտինան»։ Թիմերը խաղացել են Միլանի «Սան Սիրո» (Ջուզեպպե Մեացա) մարզադաշտում։ Հանդիպումն ավարտվել է միլանյան թիմի՝ 2-1 հաշվով հաղթանակով:

Հանդիպման հաշիվը բացվել է 28-րդ րոպեին, երբ «Ֆիորենտինայի» պաշտպան Մարին Պոնգրաչիչը գնդակն ուղարկել է սեփական դարպասը։ 44-րդ րոպեին Ռոլանդո Մանդրագորան 11-մետրանոցից հավասարեցրել է հաշիվը։ 52-րդ րոպեին Մարկո Արնաուտովիչը առաջ է մղել դաշտի տերերին։

Հայաստանի ազգային հավաքականի նախկին ավագ Հենրիխ Մխիթարյանն իր թիմի մեկնարկային կազմում է դուրս եկել խաղադաշտ, սակայն փոխարինվել է 65-րդ րոպեին։

Անցկացրած 24 խաղից հետո Միլանի «Ինտերը» 54 միավորով զբաղեցնում է Ա Սերիայի մրցաշարային աղյուսակի երկրորդ տեղը։ «Ֆիորենտինան» 6-րդ տեղում է՝ նույնքան հանդիպումներից հետո վաստակելով 42 միավոր։