Եթե գանք ոչ-ոքի խաղալու համար՝ կպարտվենք․ Մելիքյանը՝ Դյորի դեմ խաղից առաջ

Կոնֆերենցիաների լիգայի որակավորման 2-րդ փուլում «Փյունիկը» հյուրընկալվելու է հունգարական «Դյորին»։ Խաղից առաջ «Փյունիկի» գլխավոր մարզիչ Եղիշե Մելիքյանն ու ֆուտբոլիստ Մատաս Վարեյկան պատասխանել են լրագրողների հարցերին․

«Ասեմ, որ Օտուբանջոյի հեռանալը չնախատեսված կորուստ էր։ Սա ֆուտբոլ է ու ինքն ուներ առաջարկ ու չէինք կարող չընդառաջել։ Նա շատ բան է արել «Փյունիկի» համար ու ինքն արդեն հոգեբանորեն մեր հետ չէր։ Ուներ լավ առաջարկ և որոշեցինք, որ նա չմասնակցի այս խաղին։ Ճիշտ չէր լինի, որ այդ հոգեբանությամբ ֆուտբոլիստին բերեինք այստեղ ու պահանջեինք, որ պայքարեր։ Նման փորձը ցույց է տալիս, որ եթե հոգեբանորեն թիմի հետ չէ ֆուտբոլիստը, չի կարող պայքարել։ Սա ֆուտբոլ է։ Մեզ դուր եկավ, թե չեկավ, այստեղ ոչ մեկ մեղավոր չէ։

Խաղի մասին կարող եմ ասել, որ մենք տանը շատ դժվարությամբ կարողացանք հաղթել և ավելի դժվար կլինի մեզ համար այստեղ՝ ունենալ լավ արդյունք։ Մենք հոգեբանորեն պատրաստ ենք, տակտիկապես պատրաստ ենք։ Չեմ կարծում, որ մենք ունենք ինչ-որ պրոբլեմ, որ վաղը չկարողանանք լուծել մեր հարցերը։ Շատ դժվար է լինելու, որովհետև մենք ավելի լավ ենք ճանաչել այս թիմին տնային խաղում և գիտենք, որ այստեղ ավելի բարդ է լինելու, ավելի ուժեղ է խաղալու, որովհետև իրենք խաղում են սեփական հարկի տակ։ Հոգեբանորեն պատրաստել ենք թիմին։ Այն, որ մենք գալիս ենք այստեղ հաշիվը 0։0 և ուզում ենք ու մեծ ցանկություն ունենք գոլ խփել, հաղթել։ 

Եթե մենք գանք ոչ-ոքիի նպատակով և անցնելու նպատակով, այդ արդյունքով մենք կպարտվենք, դրա համար ուզում ենք այստեղ արդյունքի հասնել հաղթանակով», - նշել է Մելիքյանը։

Մանրամասն տեսանյութում․



Հիշեցնենք, որ թիմերի միջև 1-ին խաղն ավարտվել էր երևանյան ակումբի հաղթանակով՝ 2։1 հաշվով։ Պատասխան խաղը կկայանա այսօր և կմկենարկի 20։00-ին։