Ես հարգում եմ մրցակից թիմին, նրանց մարզչի կարծիքը, սակայն խաղում տեսածն ամենևին չէր վկայում, թե մենք թույլ էինք․ Մանուել Տուլիպան՝ Ունիվերսիտատեա Կլուժի դեմ խաղից առաջ

Կոնֆերենցիաների լիգայի որակավորման 2-րդ փուլի «Ունիվերսիտատեա Կլուժ»-«Արարատ-Արմենիա» դիմակայության պատասխան խաղից առաջ տեղի է ունեցել երևանյան ակումբի գլխավոր մարզիչ Մանուել Տուլիպայի ու պաշտպան Կամո Հովհաննիսյանի նախաղային մամուլի ասուլիսը․

1-ին խաղի մասին Տուլիպան նշել է․ «Իմ կարծիքով 1-ին կեսում ամեն ինչ այդքան էլ լավ տեսք չուներ։ Կարևորը կարողացանք կառավարել իրավիճակը։ Մի քանի շատ լավ դրվագներ ունեցանք 2-րդ կեսում, քանի որ կարողացանք շտկել շատ բաներ»։

«Ամենայն հարգանքով մրցակցի թիմի ու մարզչի կարծիքի հանդեպ, ամեն դեպքում, այն ինչ տեսանք խաղադաշտում, խոսում էր այն մասին, որ բացարձակ կերպով չենք կարող ասել, որ այդ դիմակայության թույլ կողմն էինք։ Խաղերում հնարավոր է լինեն առանձին լավ որակով ֆուտբոլիստներ, ֆինանսապես ավելի կայուն ու լավ թիմ, բայց այդ գործոնները չէ, որ խաղում հաղթում են։ Թիմային խաղն ու մյուս որակները ևս բերում են վերջնական հաջողության», - ի պատասխան նախորդ խաղից հետո ռումինական թիմի գլխավոր մարզչի խոսքերին, որը նշել էր, թե «Ունիվերսիտատեա Կլուժը» այս դիմակայության բացարձակ ֆավորիտն է։

Մանրամասն տեսանյութում․



Հիշեցնենք, որ թիմերի միջև կայացած 1-ին հանդիպումն ավարտվել էր 0։0 հաշվով։ Պատասխան խաղը կկայանա այսօր և կմեկնարկի 21։00-ին։