Սպերցյանը խոսել է Կրասնոդարից հեռանալու մասին

«Կրասնոդարի» և Հայաստանի հավաքականի կիսապաշտպան Էդուարդ Սպերցյանը պատասխանել է ռուսական ակումբից հեռանալու մասին հարցին։

«Ինչպես տեսնում եք, ես դեռ խաղում եմ այստեղ։ Դեռ ժամանակ կա, կտեսնենք՝ ինչ կլինի,- ասել է Էդուարդ Սպերցյանը «Match TV»-ի եթերում։

Ավելի վաղ հաղորդվել էր, որ Էդուարդ Սպերցյանը համաձայնեցրել է պայմանագրի պայմաններն անգլիական ակումբի հետ, ըստ որի՝ տարեկան 1.9 միլիոն եվրո աշխատավարձ կստանա, իսկ թիմի՝ Անգլիայի Պրեմիեր լիգա դուրս գալու դեպքում այն կավելանա։

«Սաութհեմփթոնի» գլխավոր մարզիչ Ուիլ Սթիլը նշել է, որ Սպերցյանը լավ խաղացող է, և իր ակումբը հետաքրքրված է լավ խաղացողներով։ «Սաութհեմփթոնը» Ռուսաստանի չեմպիոններին առաջարկել է 12.5 միլիոն եվրո Սպերցյանի համար։

Սպերցյանը «Կրասնոդարի» սան է։ «Ցուլերի» կազմում կիսապաշտպանը խաղացել է 145 խաղ, խփել 44 գոլ և կատարել 32 գոլային փոխանցում։ Transfermarkt-ի տվյալներով՝ ֆուտբոլիստի շուկայական արժեքը կազմում է 25 միլիոն եվրո։

Նախորդ օրը՝ «Սոչիի» դեմ խաղում, Սպերցյանը խփել է երկու գոլ և կատարել մեկ գոլային փոխանցում։ Խաղի արդյունքը 5:1 էր: Հինգ տուրից հետո «Կրասնոդարը» ունի 12 միավոր և ՌՊԼ-ի մրցաշարային աղյուսակում զբաղեցնում է երկրորդ տեղը: «Լոկոմոտիվը» առաջատարն է 13 միավորով: