Սպերցյանը մերժել է սաուդյան ակումբներից մեկի առաջարկը, եվրոպական ևս երկու ակումբ հետաքրքրված է հայ ֆուտբոլիստով

«Կրասնոդարի» ավագ Էդուարդ Սպերցյանը մի քանի եվրոպական ակումբների ուշադրության կենտրոնում է։ Բացի «Սաութհեմփթոնից», 25-ամյա հայ ֆուտբոլիստի նկատմամբ հետաքրքրություն են ցուցաբերում Եվրոպայի ուժեղագույն առաջնությունների ևս երկու ակումբներ։

Arménie Football-ի տվյալներով՝ Սպերցյանի ծառայություններով հետաքրքրված են «Պորտուն» և «Լենսը»։ Պորտուգալական ակումբը «Կրասնոդարին» առաջարկել է 10 միլիոն եվրո + փոխանակում իր խաղացողներից մեկի հետ։ Լենսը պատրաստ է վճարել 12 միլիոն եվրո Էդուարդի համար և գործարքում ներառել տարբեր բոնուսներ։

Սակայն ակումբները պետք է լիովին քննարկեն տրանսֆերի տեխնիկական կողմերը, քանի որ վերջին տարիներին Անգլիայի և Ռուսաստանի միջև դրամական փոխանցումները դժվար են եղել։

Նախկինում հաղորդվել էր, որ «Սաութհեմփթոնը» Սպերցյանի տրանսֆերի հիմնական հավակնորդն է։ Անգլիական ակումբը ֆինանսական տեսանկյունից ամենաշահավետ առաջարկներն է արել «Կրասնոդարին» և խաղացողին։ Էդուարդ Սպերցյանը «Կրասնոդարի» սան է։ 2024/2025 մրցաշրջանում նա օգնել է «ցուլերին» պատմության մեջ առաջին անգամ դառնալ Ռուսաստանի չեմպիոն։

Միաժամանակ հաղորդվում էր, որ Սաուդյան Արաբիայի ակումբները նույնպես հետաքրքրված են Սպերցյանով, բայց խաղացողը ցանկանում է խաղալ Եվրոպայի առաջնությունում։