Հայտնի է ՊՍՎ-ի դիրքորոշումը՝ Սպերցյանի թեկնածության շուրջ

«Կրասնոդարի» և Հայաստանի հավաքականի կիսապաշտպան Էդուարդ Սպերցյանը կարող է կարիերան շարունակել ՊՍՎ-ում։ Այս մասին հաղորդում է Metaratings-ը։

Աղբյուրի տվյալներով՝ հոլանդական ակումբի ղեկավարությունը պատրաստ է պայմանագիր կնքել «Կրասնոդարի» խաղացողի հետ, եթե թիմի մարզչական շտաբը հետաքրքրություն ցուցաբերի տրանսֆերի նկատմամբ և նման նախաձեռնությամբ դիմի ՊՍՎ-ի ղեկավարներին։ Սակայն, այս պահին ՊՍՎ-ի գլխավոր մարզիչ Պետեր Բոշը պատրաստ չէ հրավիրել Սպերցյանին, քանի որ տեսնում է հարձակման գիծն ուժեղացնելու այլ տարբերակներ։ Սակայն կա հնարավորություն, որ ՊՍՎ-ն հետագայում վերադառնա «Կրասնոդարի» կիսապաշտպանի թեկնածությանը։

Բացի այդ, հոլանդական ակումբը Սպերցյանին տեղեկացրել է, որ տրանսֆերի դեպքում ՊՍՎ-ն խնդիրներ չի ունենա «Կրասնոդարին» վճարումներ կատարելու հետ կապված։

Էդուարդ Սպերցյանը «Կրասնոդարի» սան է։ Նրա պայմանագիրն ուժի մեջ է մինչև 2026 թվականի հունիսի 30-ը։ Ընդհանուր առմամբ, կիսապաշտպանը «ցլերի» կազմում անցկացրել է 151 խաղ բոլոր մրցաշարերում՝ խփելով 48 գոլ և կատարելով 36 գոլային փոխանցում։