Նարեկ Կապուշյանը՝ բասկետբոլի Մ16 հավաքականի գլխավոր մարզիչ
Նարեկ Կապուշյանը նշանակվել է Հայաստանի բասկետբոլի մինչև 16 տարեկանների հավաքականի գլխավոր մարզիչ:
Այս մասին հայտնում է ՀԲՖ մամուլի քարտուղարությունը:
Նա նաև գլխավորում է ԱՄՆ-ի ՀԲԸՄ (AGBU Canoga Park) ավագ դպրոցի տղաների թիմը։ Յոթ տարվա ընթացքում իր ղեկավարությամբ թիմը գրանցել է ավելի քան 100 հաղթանակ, երկու անգամ հասել է CIF-SS կիսաեզրափակիչ, երկու անգամ մասնակցել է CIF նահանգային փլեյ-օֆֆերին, երեք անգամ դարձել է լիգայի չեմպիոն և մի քանի անգամ ունեցել է 20 և ավելի հաղթանակներով ավարտված մրցաշրջան։ Այդ ընթացքում թիմը 5-րդ դիվիզիոնից բարձրացել է մինչև 2-րդ դիվիզիոն։
Կապուշյանը Հայաստանի ազգային հավաքականում հանդես է գալիս նաև որպես գլխավոր մարզչի օգնական։ Նա ամառային ամիսներին աշխատում է Բասկետբոլի ազգային ասոցիացիա (NBA)-ի և NCAA առաջին դիվիզիոնի մի շարք խաղացողների հետ՝ աջակցելով նրանց անհատական հմտությունների զարգացմանը և խաղային որակի բարձրացմանը։
Իր խաղային կարիերայի ընթացքում Կապուշյանը դպրոցական առաջնություններում վաստակել է ավելի քան 1000 միավոր, հանդես է եկել ուսանողական մակարդակում և մեկ մրցաշրջան խաղացել կիսապրոֆեսիոնալ լիգայում։
2016-ին նա հիմնել է «Ռեբելս» ակումբը, որը նպատակ ունի զարգացնել երիտասարդ մարզիկների բասկետբոլային կարողությունները և տալ նրանց աճի համար անհրաժեշտ փորձ ու աջակցություն։
Նշենք, որ Հայաստանի մինչև 16 տարեկանների հավաքականը Նարեկ Կապուշյանի գլխավորությամբ կմասնակցի 2026 թվականի ամռանը կայանալիք Եվրոպայի C դիվիզիոնի առաջնությանը:
